23 снежня 2024 года пад кіраўніцтвам рэктара БДПУ Аляксандра Іванавіча Жука адбылося пасяджэнне Савета ўніверсітэта.

З інфармацыяй “Аб арганізацыі і выніках адукацыйнага працэсу з замежнымі студэнтамі на факультэце эстэтычнай адукацыі” выступіла дэкан факультэта эстэтычнай адукацыі Ірына Уладзіміраўна Шасцітка.

Дакладчык адзначыла, што адукацыйны працэс з замежнымі студэнтамі на факультэце мае мэтанакіраваны і комплексны характар.

У гэтым навучальным годзе на ФЭА вучацца 130 замежных студэнтаў, з іх 126 чалавек – у дзённай форме атрымання адукацыі.

Адукацыйны працэс забяспечваюць больш за 60 выкладчыкаў, якія маюць вучоныя ступені і вучоныя званні, а таксама высокія званні ў галіне мастацтва, з’яўляюцца членамі прэстыжных прафесійных аб’яднанняў.

Для фарміравання прафесійных кампетэнцый на групавых вучэбных занятках з замежнымі студэнтамі прымяняюцца актыўныя формы навучання.

Вывучэнне музычна-тэарэтычных дысцыплін арганізавана з апорай на дыферэнцыраваны падыход і вопыт музычна-тэарэтычнай дзейнасці з выкарыстаннем інтэрактыўных метадаў навучання і дыягностыкі.

Асноўнай формай правядзення вучэбных заняткаў з'яўляецца практычная (у тым ліку індывідуальныя), пераважае дэманстрацыя музычных фрагментаў і вырашэнне музычных заданняў.

Пры арганізацыі індывідуальнай работы з замежнымі студэнтамі ўлічваюцца нацыянальныя культурныя, асобасныя асаблівасці, матывацыя, каштоўнасныя ўстаноўкі, за аснову бярэцца персаніфікаваная мадэль навучання, у цэнтры якой стаяць інтарэсы, патрэбнасці, магчымасці замежных студэнтаў.

Для вырашэння задач эфектыўнага навучання замежных студэнтаў на індывідуальных занятках ствараюцца асаблівыя псіхолага-педагагічныя ўмовы (псіхалагічны кантакт з выкладчыкам, падтрымка і пастаянны кантроль за работай студэнта, баланс у падтрымцы і патрабавальнасці ў навучальным працэсе), эмацыянальна спакойная рабочая атмасфера, дакладна вызначаюцца задачы і патрабаванні.

Узровень навуковай працы з замежнымі студэнтамі пацвярджаецца добрымі вынікамі іх удзелу ў навуковых конкурсах. Работы замежных студэнтаў, пададзеныя на Рэспубліканскі конкурс навуковых работ студэнтаў, адзначаны дыпломамі 2-й і 3-й катэгорыі. Міжнародныя навукова-даследчыя конкурсы “Дасягненні навукі ВНУ”, “Навуковыя перспектывы”, “Навуковы імпульс” прынеслі замежным студэнтам факультэта дыпломы 1-й ступені.

Студэнты з Кітая задзейнічаны ў працы творчых калектываў (Народны ансамбль цымбалістаў “Вярба”, ансамбль скрыпачоў “La vie”, хор кітайскіх студэнтаў “Вясёлка”, хор “Love Music Teame”, хор “Gaudeamus”), правядзенні культурна-масавых мерапрыемстваў і дабрачынных акцый.

Паказчыкам высокага ўзроўню прафесійнай падрыхтоўкі замежных студэнтаў у галіне музычнага і выяўленчага мастацтва служаць перамогі кітайскіх студэнтаў у рэспубліканскіх і міжнародных конкурсах. За апошнія тры гады 8 студэнтаў-замежнікаў сталі лаўрэатамі і дыпламантамі шэрага музычных-выканаўчых конкурсаў рэспубліканскага і міжнароднага ўзроўняў.

Студэнт 4 курса факультэта эстэтычнай адукацыі Ван Дэлун, старшыня савета кітайскіх студэнтаў, ад імя суайчыннікаў падзякаваў кіраўніцтву ўніверсітэта і факультэта за выдатную арганізацыю адукацыйнага працэсу, адзначыў шчырую зацікаўленасць выкладчыкаў у выніках сваёй працы.

Саветам БДПУ быў прыняты шэраг важных рашэнняў. Поўны тэкст пастановы будзе накіраваны ва ўсе структурныя падраздзяленні ўніверсітэта.